Śloński heimat w Reichu

Musza Wom pedzieć roztomili Ludkowie, że kaj yno człowiek sie pylnie, tam wszyndzi pełno Hanysow. Ale nojwiyncyj je ich chyba we Niemcach. Wiadomo som to ludzie, kierzy dwajścia pora lot tymu, abo i pryndzy pojechali „za chlebym” i tam już łostali.

Prziszło też mi łostatnio ważić na takim wielkim fajerze we Nimcach. Slońsko muzyka, śloński kust, no i fol Hanysow, kierzi miyszkajom we Rajchu. Powiym wom yno tela – jak ci Ludkowie się piyknie bawiyli, aż było uciecha zaglondać. Jak tak żech sie im przijrzoł, toch wyształnowoł, że śloński Heimat je tam kaj som Hanysy. Wcale a wcale nie cza mieszkać na Ślońsku, żeby czuć sie Ślońzokiym. A ku tymu cza tym ludziom pochylić czoła, że flyjgujom te wszystki śloński tradycje (godka, kust czy zachowani).

No i jeszcze nojważniejszo rzecz – ślońsko solidarność, kierej jakoś u nos mi brakuje. Tam we Rajchu kożdy sie staro pomogać drugimu, a u nas widza je jakoś blank inakszy. Jedyn drugimu zowiści, keby tyn drugi yno ni mioł trocha lepszy. A kaj je ta prawdziwo ślońsko życzliwość, kierej nigdy u nos nie brakowało? Czy my Ślońzoki kajś sie potracili w tych swoich wartościach?

Jo dycki godom, że nojważniejszy we wszystkim je człowiek. A to co łon mo to je sprawa drugorzyndno. Kochani L:udkowie nie zapominajcie o tym czego uczyły nas nasze starki i prastarki – naszej tożsamości. Bo człowiek dziypiyro mo se za coś, to czego już ni mo. Bez to dbajcie o tyn swoj śloński Heimat, pod wiela go mocie. Pyrsk!

---

Słowniczek:

Pylnyć – jechać
Fajer – impreza
Kust – jedzenie
Fol – pełno
Heima – dom rodzinny
Blank – całkowicie