Ślońsko zegrodka

Łostatnio mi kieryś tromfnoł, że zegrodki już som niy modne, a kole chałupy majom być yno iglaczki i dużo eleganckiego kamiynio. Wnerwioł ech sie jak pieron. Jeszcze mi na dekel nie pizło, żebych lotoł z kajsterkom bez lato po grincojg do sklepu. Ni ma mowy.

Terozki sie preferuje, żeby kole chałupy było wszysko przemyślane ogrodniczo i ni ma miejsca na zegrodka z kaj jakom zieleninom.

A jo se tak myśla, że ludzie som za fest zgniyli i sie im robić nie chce. Bo tako zegrodka cza non stop plyć, a jeszcze wcale jak durch padze. A kiery sie tera rod marasi ziymiom. Nojlepszy kupić kosiara i na okrągło brusić niom tam a nazot. Szkoda, że nie ma takij co sama śiecze. A jo sie s takich ludzi yno śmieja. Nie doś, że muszom lotać z tymi kablami, to jeszcze sztrom abo bynzina cza płacić.

A niy lepszy by było se tak posioć marekwia, pietruszka na korzyń i zielone, radistki, szałot, fandzole, buraczki, czy ogorki kiere nojlepszy zakisić. Przeca zupa ze świyżej gymizy, zarozki blank inakszy szmakuje. Już sie nie umia doczkać na świyże sznitbony.

A ku tymu wiycie jak człowiek bez lato prziszporuje na kuście. Świyży ukopany zimiok z koperkiem, jajco od kury kiero tyro po placu i zielony szałot z zalywkom octowom –  w szmaku bajka i praktycznie darmo. Przeca piyrwej ludziska yno tak jedli i byli zdrowi jak ryby, a do tego nie udowali piyndzy.

Myśla, że moji argumynta Wos troszka przekabaciły.

Tak na koniec to wom yno powiym, że troszka ech porajzowoł po świecie i tam żech podziwioł roztomańte zegrodki kaj były tomaty i inszo gymiza. Czysto gynsto te zegrodki były przi willach z basynami i na pewno właściciele niy chcieli prziszporować, yno szło o cosik blank inszego. A o to, żeby mieć dycki świyży towor prosto z kszoka.

Myśla, że my tyż chned przidymy po rozum do gowy.

A wom życza  udanego plycio i bogatych plonow w zegrodce. Pyrsk!

Tromfnoł – zarzucił

Zegrodka – ogródek

kajsterka – torba zakupowa

zgniyli ludzie – leniwi ludzie

sznitbony – fasolka szparagowa

szporować – oszczędzać