Wiycie na cołkim świecie, tyn co produkuje jedzyni je kimś i je fest skuli tego szanowany. W takij Austrii, Niymcach bamber to je ktoś. U nos we Polsce je inakszy. Rolnik– przeca kożdy nim może być, yno musi mieć troszka pola. I tu sie nie zgodza, bo tej robocie trza fest rozumieć. Przeca trza wiedzieć kiedy, jako, sioć, sadzić, zbiyrać, o howaniu gowiedzi i lewyntorza już nie spomna.

Rolnik– to ni ma fach na dzisiejsze czasy, zresztom taki wieśniacki (tak sie dzisio słyszy). No to jo sie pytom, wto mo nos wyżywić, jak nie tyn wieśniacki rolnik?

Wiycie poradza wiedzieć co to je robota na polu, skiż tego, że stażiki były gospodorzami, a i som dycki coś ech chowoł. I wiym też, że momyntami, ta robota je niezapłacono, choć dowo też kupa satysfakcji (tak piyknie sie to terozki nazywo) jak rośnie, a plony som szykowne.

I tak se terozki ształnuja kaj je tyn szacunek do chleba i tego wto go produkuje, czyli rolnika? Czy w tym, że płaci sie mu 3,5 złotka za kilo żywca wieprzowego, czy w tym, że nie skupuje sie łod niego tego co wyprodukuje, a jak już to za grosze. Beztoż sie pytom, kaj my z tom politykom rolnom idymy?

Jo by tak kozoł ministrowi rolnictwa gospodarzić na 6 hektarach i spróbować z tego żyć przez rok. Mono wtedy by sie coś zmiyniyło.

Wiycie jo żodnego nie bronia, ani hajerow, ani rolnikow, ale jakby w Polsce było dobrze, to by żodyn na drogi nie wylazowoł.

Życzoł bych se, żeby w tyj naszyj Polsce było kiedyś rychtyk dobrze. Pyrsk

Bamber – gospodarz

Gowiedź – drobny inwentarz

Ształnuja – zastanawiam się