Wiycie jak kożdy rok bez lato, po mie łażom roztomańte szmaki. A to parowki z kompotym z borowek, a to oberiba, o botwinie czy sznitbonach z bułkom tarom i masłym nie spomna. Ale to wszysko skiż tego, że człowiek to wszysko kole sia mo, a do tego chyba nasz organizm som wiy, co je do niego dobre.

Bez lato jy sie bardzi lekko, beztoż królujom zimioki, kiszka, maślonka i wszysko co uno z tego idzie uważić. Mie to nojlepszy o tym czasie szmakujom placki z młodych zimiokow.

Piyrwej na placki godali stryki, kiere sie jodało z maślonkom abo z kwaśnom śmietonkom.

Jak zaś wto mioł w doma blacha, a kiejś kożdy mioł (bo przeca na czymś musioł warzić), toż robioł chlastoki, czyli placki pieczone na blasze z pieca, kiero yno trza było pomazać skorom ze szpyrki, żeby sie za moc nie chytały. Do tego fajne szpyrki wyskważone z wyndzonego świńskigo brzucha i już boł łobiod ja trza.

Dzisio chlastoki wyszły z mody, bo przeca kożdy woli chrupiące placki. Ale zrobić taki chrupkie, ni ma tak łaps. Bo musi być dobry zimiok, kiery nie czorni zarozki po trzyciu i mo dużo skrobie. No i jeszcze trza placki dobrawić korzyniym, solom, czosnkiym i cebulom.

Tak na koniec chca wom yno pedzieć, że zimioki bardzo dobrze odkwaszajom organizm, beztoż jydzcie placki, a nie pilulki kiere durch reklamujom.

A ci kierzi som wygodni, zawsze mogom przijś na gotowca, do moji restauracyje, kaj momy placki w piynciu zortach. Smacznego!

Zorta – rodzaj

sznitbon – fasolka szparagowa

kiszka – kwaśne mleko

blacha – piec węglowy

szpyrki – skwarki

Audycja „Rączka gotuje” również w Radiu Vanessa FM od poniedziałku do soboty o 11.45 i 16.45