Wiycie, momy ostatnio dożynkowy czas. Rolniki dziynkujom Pon Boczkowi, że doł im zebrać z pola obiyla, siano, zimioki i kaj jako gymiza.

A latoś nie było lekko, bo sztyc kidało, o wichurach, burzach, gradzie nie spomna.

A tyn borok rolnik, może yno dobrze pożykać, żeby go wszysko co złe minyło i podziwać sie w niebo.

Ale nie do końca chca ło tym dzisio kludzić. A ło tym, że rolnik ciynżko robi, maras mo za pazurami, a na koniec marno zapłata. Bo przeca obiyla latoś słabo stojom, a wszysko skiż tego, że do Polski sie skludzo obiyli z Ukrainy, kiere je o połowica łacniejsze. I kaj tu je syns i logika? Wykończyć polski rolnictwo, a potym myśleć co dali.

Przeca świń to już chnet żodyn nie chowie, bo sie nie spłaci w cale, a szinki we sklepach, yno droksze. Toż jako to je? Jo nie poradza rozumieć.

I do tego jeszcze tyn żodyn szacunek do roboty w polu. Po co, przeca we sklepie je wszysko. Zresztom nikiere bajtle to se myślom, że gymiza je z Hipermarketu, a nie z ziymie. No ja, jak by tak wszyjscy myśleli, to za chwila marekwia bydymy jeś z Ukrainy, tomaty z Holandie, zimioki z Grecje, a ogorki z Hiszpanie. Yno sie pytom jakij to je jakości? Sami se odpowiydzcie.

A smak i woń swojskij gymizy, na „gnoju” to je inny wymiar. A ci go nie znajom, to jich już żałuja.

Pamiyntejcie, że jak ni ma produktu, to ni ma tyż porządnego jedziynio, a rolnikowi, sie dycki noleży szacunek.

Pyrsk

kidze – pada

obiyli – zboże

pazury – paznokcie

Audycja „Rączka gotuje” również w Radiu Vanessa FM od poniedziałku do soboty o 11.45 i 16.45