Powiym wom, że do Polski trefiajom roztomańte mody i choć my wolymy, to co nasze, to i tak ludzie rajzujom po cołkim świecie i bele co prziwożom mit.

Takim dobrym przikładym je świynto młodego wina, kiere sie mianuje „Beaujolais Noveau”.

I choć je to francuski zwyczaj, to wiadomo, że my radzi fajrujymy i cudze świynta. Przeca Walentynki, Halloween, czy właśnie Beaujolais Noveau to nie nasze, ale fest sie nom podobo.

Ale tak se myśla, że we wszystkich tych świyntach nojważniejsze je to, żeby sie spotkać, podżistać i polachać.

Do tego na świyncie wina, kosztuje sie kulturalnie młode latosi wino, co blank inkszy wyglondo, niż chlapani gorzołki.

A wino przipomna, przeca w małych ilościach je zdrowe, bo bezmałaś poprawio krążyni, trowiyni i je na krew (ale yno czerwone). Francuzi przeca nie wyobrażajom se jedziynio bez wina. My momy troszka inszo kultura, kaj dycki królowała gorzoła, ale to tyż sie zmiynio.

Ale wroca sie jeszcze do wina– to tak myśla, że przeca w naszej kulturze tyż sie wino produkowało (choć bardzi owocowe, niż z winogron), a listopad to boł idealny czas na piyrsze kosztpróby z korflasze.

Jedno je pewne, w trzeci czwortek listopada je świynto młodego wina, beztoż mocie super okazjo, żeby sie trefić ze znajomymi i pofajrować przi lampce wina. Pyrsk