Rybnicki Genezaret

W minioną niedzielę Chwałęcice przeżywały niecodzienne wydarzenie – mszę na wodzie w intencji nieżyjących żeglarzy. O tej niezwykłej liturgii opowiada jeden z najbardziej znanych mieszkańców Chwałęcic – Bogdan Dzierżawa, laureat konkursu na Ślązaka Roku.

 

– Niy wiym jak Wy, ale my sie tukej kolybiymy na tyj naszyj „Barce”, tak prziwitoł zebranych, 22 czyrwnia, nad „rybnickim morzym” wiernych chwalyncki farorz ks. Grzegorz Jagieł z pływajoncego na dwóch łodkach, zrobionego przez rybnickich żaglorzy, Stołu Pańskigo.

 

Potym wspomnioł, że dwa tysionce lot tymu Jezus Chrystus tyż z łodki nauczol swojich uczni i wiernych na jeziorze Genezaret, i niy przipuszczoł wtedy, że teraz Słowo Boże z łodki i w Rybniku bydzie głoszone.

 

Żeby tako mszo na wodzie zrobić w intyncji wszystkich żaglorzy, kerych już nima miyndzy nami i tych, kerzi na rybnickim jeziorze życi straciyli, wpadli żaglorze z klubu Nawa i ratownicy wodni, kerzi pływiom na swojich łodkach po tym zbiorniku.

 

Piykno to ideja i godno naśladowanio. Mocka ludzi zebralo sie nad brzegiym przistani żeglarskij Nawa, żeby uczestniczyć w takim nowatorskim nabożyństwie. Krom ludzi zebranych na brzegu, dużo samych żaglorzy brało udział we mszy na swojich motorowkach i żaglowkach, kere stoły zakotwiczone w cołkij przistani.

 

Pogoda na dokłodka tako piykno klapła, że chyba som Ponboczek tak piykny dziyń tym rybnickim żaglorzom nacechowoł.

 

W czasie podniesiynio podziwoł żech sie do nieba i ujrzoł żech pora rybitwow, kere krajzowały nad tym wodnym ołtorzym, a biołe jejich piora miechtały sie w słoneczku i zdało mi sie wtedy, że to duszyczki tych żaglorzy, za kerych my rzykali,

 

Na koniec tego piyknego i udanego nabożyństwa, żaglorze pusciyli na woda wionek, jako symbol pamiyńci o wszystkich kerym woda z rybnickigo zalywu życi odebrała i wszyjscy zebrani na brzegu wierni odmowiyli ostatnio modlitwa za jejich dusze.

 

Na pożegnanie ks. Grzegorz zaproszoł wszystkich na bezrok o tym samym czasie na te same miejsce – bo jak pedzioł – mo nadzieja, że teraz taki nabożynstwo bydzie sie odbywało co roku.

 

Bogdan Dzierżawa